(Pöhla)
In unnrer Behl do is fei schie.
Zwisch'n Rasche liegts un Rittersgrie.
Un mitten dorch do gieht dr Booch,
Do läft dos Wasser in ganzen Dog.
Dr Hahnel an dr anen Seit,
Dr Pauluswald is a net weit.
Zigeiner un dr Ochsenkup,
Die liegen iebern Siegelhuf.
De Behler Leit', doß ich d'rsch sog,
Gemiedlich sei wie ihre Sproch.
När laddschen tun se bissel gern,
Do derf mr ober net hieheern.
Un Sonntigs giehts beizeiten naus
'n Bauernwag zum Effrimhaus.
Do werd erst amol eigekehrt
Un Bier un Schnaps un Kas verzehrt.
Un wolln mr Beer un Schwamme hamm,
Giehts nieber nein in'n Barischkamm.
Un wem dos is a bissel weit,
Hots näer in dr Dörrenleit.
Mr hamm a ane Eisenbah,
Do is a gruße Klängel dra,
Die klängelt nauszu, klängelt rei,
Dos is a schiene Klängelei.
Se fährt net laut, se fährt racht schie,
Gemietlich naus bis Rittersgrie.
Un kurz vor Bähme hält se a,
Na, weil se do net wedderka.
De Klabehl hot de Gießerei,
Do dämme Mad un Mannsen ei,
Se machen Efen gruß un kla,
Domit mr sich dra wärme ka.
In'n Klippeln hamm mr a viel lus.
Bei uns do klippeln Kla un Gruß.
Un war noch net wos rachtes ka.
Dar fängt zuerst 's Wasserle a.
Mr hamm a grußes Warenhaus
Dos sieht racht schie un freindlich aus.
Do gibbt es Salat, Dill un Möhrn
Sehr billig, un a Zwiebelröhrn.
Doch wos uns fahlt, dos is net schie
Mr missen nach Griestadtel gie.
De Glock'n hamm mr, 's is a su,
Zur Kirch, do fah'ln de Pfenng drzu.
In unnrer Behl, do is fei schie,
Zwisch'n Rasche liegts un Rittersgrie.
Un war mr dos net gelaben ka,
Dar kumm un sah sichs salber a.
"Unnre Behl" wurde 1934 von Emil Walter gedichtet.Emil Walter wurde in Pöhla geboren und war von 1896 bis 1933
Journalist beim "Uckermärkischen Kurier".
Nach seiner Tätigkeit als Hauptschriftleiter ging er
zurück nach Pöhla und schrieb dieses Gedicht .